Colyn maak Man Kos

Die feesseisoen is op ons en noodgedwonge gaan meeste van ons met oorskiet braaivleis sit. Ons gaan ook meer kos maak want dis mos kuiertyd. Die groot uitdaging is dan ook om darem so bietjie gesonder kos tussen die brasserny in te druk.

Vandag gaan ek bietie 'n storie skryf oor hoe ke oorskiet gebruik en ook so goeie skep groen goed byvoeg. Hierdie is nie werklik 'n resep nie maar meer 'n storie oor hoe jy die ding kan doen.

Jy gaan benodig ...
1. Oorskiet vleis ... maar jy kan maar maalvleis gaar maak of wors.
2. Groen mielies.
3. Spinasie blare.
4. Bisto of wat jy ookal gebruik vir sous maak.
5. Koekmeel.
6. Uie.
7. Rissies
8. Room ... opsioneel.
9. Varkvet ... of enige olie waarmee jy braai.

Kook die groenmielies sag ... ek gebruik sommer my stomer in die mikrogolf oond. Sny die pitte van die stronk af en roer bietjie botter by en geur met een of ander braaisout.

Sny die stingels uit die spinasie uit en kap fyn. Ek sê dat ek die spinasie ontbeen.

Kap jou ui fyn asook die rissies.

As jy oorskiet vleis gebruik, sny in klein blokkies, omtrent ertjie it grootte.

Kerf die spinasie blare in fyn repe.

Meng gelyke dele van jou Bisto en koekmeel.

Sit nou 'n ordentlike skep varkvet in jou braaipan. Moenie nou snoep wees nie want jy gaan die sous in die vet bou.

Gooi bietjie gemaalde peper en braaispeserye in die warm vet. Sodra jy dit sterk ruik, gooi die uie, spinasie stingels en chillies in die warm vet en roerbraai. Jy soek a redelike warm pan.

Sodra die uie lekker sag is, gooi die vleis in en roer goed. Jy wil hê alles moet bietjie saam braai. Gooi nou die meelmengsel oor en roer goed. Gee dit so 60 sestig sekondes en dan gooi jy water by ... koue water. Jy wil hê die storie moet sterk reageer en borrel en kook dat dit bars. Bly roer totdat dit kalmeer. Begin met a koppie water en voeg meer by as die sous te dik is. Moenie bang wees vir teveel nie want jy kan dit altyd afkook.

Sodra alles nou nou lekker prut, draai die hitte af op laag en skep die rou spinasie blare in die bodem van pasta bord. Volgende skep jy mielies op die blare en dan skep jy die souserige bredie bo-oor. Laat net so staan vir so 3 minute.

Ek garneer met mielies en radyse.

En dis al ... die hitte van die bredie gaan die blare verwelk maar dit gaan steeds mooi groen wees en baie smaakvol.


Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

1.8kg Grotman Chop

So twee weke gelede stap ek by my gunsteling vleiswinkel in en ek steek dood in my spore vas. Daar in die vertoonyskas staan 'n stuk vleis op 'n houtplank, kompleet met 'n bankskroef. Mensig maar dis 'n mooi prentjie. In my geestesoog sien ek al hoe die mes teen die been afgly ... en my mond begin water.

Ek wink vir Wimpie nader ... "Hoeveel vir die stuk vleis en die bord ?"

Sag en sappig

Tien minute later sit ek in my kar en skud my kop ... ek gesels kliphard met myself. Ek beter hulp gaan soek ... hierdie ding van my en vleis is nou besig om handuit te ruk. Ek steek 'n Camel aan die brand en kyk hoe die blou rook rustig by die venster uit trek .... Nee ek kort nie hulp nie ... ek is 'n man en ek is 'n vleisvreter.

My grootste uitdaging was om te besluit wie gaan ek nooi om hierdie pronkstuk saam met my te eet ... dis 'n reuse stuk vleis ... 1.8kg ... dis baie en hoe hy gaar gemaak moet word is baie belangrik. Daar is geen manier dat hy "medium well" kan wees nie ... dit sal omtrent dieselfde wees as om 'n aandpak aan te trek op 'n jagtog ... hoogs onvanpas en moet net eenvoudig nie gedoen word nie.

Teen die tyd dat ek by die huis aankom het ek my besluit geneem. Ek sal my oudste, Jacques, nooi vir die fees ... hy is baie lief vir vleis  ... die ideale gas vir die geleentheid.

Lekker man

Ek gaan nou nie Poppie se presiese woorde herhaal wat geuiter is toe ek by die kombuis instap en die stuk vleis en plank op die kombuistafel neer sit nie ... al wat ek gaan sê is dat daar wilde gesigsuitdrukkings was wat gewissel het tussen totale stomheid en passievolle uitlatings ... heeltemal teveel F's in vir publieke publikasie.

Nouja ... met sorg lê ek die pronkstuk neer in my yskas se onderste laai ... dis waar ek my vleis verouder ... hierdie kneuwel is wel reeds verouder maar ek gaan hom beslis nog so 14 dae of wat gee.

Die opvolgende dae doen ek baie navorsing ... ek is nie 'n man wat skrik vir vleis op die vuur nie maar hierdie is 'n baie groot stuk vleis ... 1.8kg en so 35mm dik ... nie jou tradisionele braaivleis biefstukkie nie.

En so breek die dag aan ... Sondag ... en ek haal die Grotman Chop uit die yskas uit. Eers smeer ek hom mooi met Suurlemoen gegeurde olyfolie en dan strooi ek gemaalde peper lekker ruimskoots oor die vleis. Ek druk die peper mooi vas en maak die pan toe met kleefplastiek. Nou moet hy rustig lê tot hy by kamertemperatuur is.

Twee uur gan die stuk bees rooster toe. My braaier, 'n gas braaier is op sy warmste en die temperatuur onder die deksel klim tot by 450C. 6 minute aan elke kant en toe skuif ek hom van die roosters af na die sogenaamde "infra-rooi" braaiplaat toe. Die interne temperatuur van die vleis is nou 38C maar daar is 'n mooi kors op die vleis. Nog 3 minute op elke kant en die temperatuur is 63C.

Vleisvreters

Ek lig die vleis af van die braaier af en op die plank. Nou moet hy 8 minute rus ... seker die belangrikste deel van die kook proses.

Almal in die kombuis staar met groot oë na die chop ... vir my is dit 'n kunswerk.

Agt minute later gly die mes teen die been af en die vleis lyk heerlik. Ek sny dit op in repies, vra die Seën en toe sak ons twee manne in daai vleis in. Daar word min gepraat ... net gekou en lippe word afgelek.

Net vleis en brood ... ManKos uit die boonste rakke. Nie sleg vir 'n eerste poging met so reuse stuk vleis op die braaier nie. Volgende een sal ek afhaal op 60C.

Ek koop my vleis by El Madre Slaghuis in Nelspruit. Vra maar vir Wimpie.


Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Saterdag 13 Oktober 2018 en die dag breek oor die Laeveld. Ek staan in my kombuis en kyk deur die venster terwyl die ketel aan die kook kom. Ek sukkel om ordentlik wakker te word as ek nie my oggend koffie in kry nie.

Finale aanbieding

Dis 'n grou dag, ligte windjie maar hy het 'n skerp kant en daar is so mistige reëntjie wat nie eers die geute aan die praat kry nie ... net so sukkelende druppery ... amper soos my skoolmaatjie, Fanie ... net 'n gehakkel.

Ons Kookskerm

Ek is nogal gespanne, die Slowveld Potjiekos Kompetisie is bekend vir strawwe kompetisie en uitstekende kos. Soort van die UITHANG potjiekos geleentheid van die jaar. #ManKos neem vir die eerste keer deel en ek weet dat ons te staande gaan kom teen spanne wat gekonfyt is in die potjiekos ding.

So vat ons die pad Witrivier toe. Nie baie geselsies in die motor nie, elkeen maar besig met sy eie gedagtes.

Varkvel Krakers en Kaiings

Met ons aankoms by Casterbridge is dit reeds woelig en almal pak af, pak uit en slaan op. Hier is dit koud en die misreën is bietjie meer manhaftig as by my op die plaas. Dit laat my nogal angstig voel. Die hoofpot is nie regtig 'n probleem nie want hy kook met sy deksel op en die Mashesa stofie sal kan oorleef in so trietsigheid. My probleem is kaiings en varkvel krakers ... dis oop potte met kokende varkvet in en dit gaan nie goed werk as daar water inval nie.

Ons slaan ons kookplek aanmekaar en spoedig begin die rokies trek. Die reën neem die wyk maar die koue bly maar knibbel.

Op 'n stadium het ek gevrees ons gaan nie betyds klaar kry nie maar met toewyding stook en kook die span en 11h50 is ons gereed vir die beoordeelaars. Nadat ek die opdiening gedoen het, haal ek diep asem en ontspan. Nou is daar niks meer wat gedoen kan word nie en ek en Jedske neem die bord na die beoordeelaars toe.

Beoordeling

Lekker Buffalo Bacon Bytes
Varkvel Krakers en Kaiings
Gemmer Varkpens
Vetkoekies
Tuisgebakte Broodrolletjies

Daar was so bietjie groente maar #ManKos is Vleis en Brood 👍

Sukses

Op die oog af het ek goeie tekens gesien tydens die beoordeling en toe is dit verby. Terug by die kookskerm is ek stomgeslaan ... alles is uitverkoop ... 22 porsies. Vir die eerste maal gaan sit ek in my stoel, nou eers besef ek hoe lekker moeg is ek werklik. Zaan en Jedske ruim op en pak die goeters in die kratte ... dankie meisies, julle is sterre.

En toe breek die oomblik van waarheid aan ...

Die amateur wenners van die Slowveld Potjiekos Kompetisie 2018 ... #ManKos

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Vandag is dit koel en klam in die Laeveld. Daardie tipe koue wat jou kort kort laat mik vir iets om aan te peusel. Augustus is mos ook Vetkoek maand en Amagwinya feeste is volop.

Wel hierdie jaar het ek besluit om ietsie anders te doen. Ek het vetkoek en vark Prego gemaak.

Vetkoek en Prego Steak

Nou voor ek verder gaan ... feitlik almal wat Prego ken, weet dat die goed gewoonlik stinkend van die knoffel is en dit is presies wat my enige dis wat die woord Prego in het, laat vermy soos die pes. Sit daar by dat dit van die minder goeie snitte gemaak word en jy sit met taai en seningrige stukkie vleis wat hop van die knoffel en meer van 'n troosprys is as iets van waarde.

So tydjie gelede het ek 'n verhouding aangeknoop met die plaaslike ESKORT slaghuis in Nelspruit. Hy het aangebied om die #ManKos Potjiekos span te borg. Dit was natuurlik 'n goeie ooreenkoms want ons Potjiekos spyskaart is 100% gebou op vark.

Voeg hier by die feit dat ek 'n groot liefde vir varkvleis het en jy kry nogal interesante disse uit die vark se lyf uit.

Terug by vandag. Ek staan in die kombuis en wonder oor wat ek in my vetkoek wil insit. My oë dwaal deur die yskas en toe onthou ek, Andrè het vir my 'n pakkie van ESKORT se Prego Steaks gegee om te probeer.

ESKORT Prego Steak

Op die oog af is dit duidelik dat die vereiste chillis is aanwesig en dit lyk na 'n goed gegeurde olie in die pakkie. Ek het nou al geleer dat vark nie regtig van baie hoë hitte hou nie en ek smelt so teelepel vark vet in my pan. Toe ek die pakkie oopsny ruik ek dadelik dat daar knoffel in die storie is en ek frons, maar nouja dis die tradisie en ek gaan maar kyk hoe rof is dit regtig.

Daar is vyf mooi stukkies steak in die pakkie en ek hou van dit wat ek sien. Ek braai dit vir so 90 sekondes op die een kant en draai om. Goed gebraai met die regte hoeveelheid korsie wat gevorm het. Nog negentig sekonds en albei kante is mooi gebraai maar ek vermoed dat dit nog rou gaan wees. Halfgaar vark is nie regtig iets wat jy moet eet nie.

Ek haal die steaks uit die pan uit ... daar is nou 'n goeie laag gebraaide sous en chillies besig om vas te brand. Ek gooi so kwart koppie water in die warm pan in en dit begn dadelik borrel. Met 'n lepel skraap ek die pan bodem mooi skoon en pak die steaks terug in die sous in. So een minuut aan elke kant en ek sny die dikste een met 'n mes. Die kleur is reg en ek haal dit uit en laat rus terwyl ek my vetkoek voorberei.

Ek bak my vetkoeke vir die soort ding altyd sodat dit heeltemal hol is. Baie plek vir vulsel met 'n heerlik korsie.

Bietjie botter ... of baie ... skeppie appelkoos konfyt, tuisgemaak, breek die steak in stukkes en pak 'n mooi lagie in die holte. Volgende, dun skyfies tamatie en 'n klompie slaai blare.

En daar is hy ... heerlik ... baie lekkerder as wat ek verwag het en die knoffel is vir my, 'n man wat sensitief is vir koffel, gladnie 'n probleem nie.

Ek kan die pakkie  #ESKORT Prego Steak aanbeveel. Dis goeie waarde vir geld en anders as met baie Prego pakkies, is hierdie vleis heerlik sag en sappig.

Lekker Vetkoek dag vir julle.

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Seker so twee jaar terug het ek die eerste keer by Turn and Tender gaan eet en dit was vir my gladnie 'n goeie ervaring nie. Ek het die skaapchops, 80gr bestel en ai tog, dit was dun doodgebraai en droog.

Turn and Tender - Crossings Nelspruit

Ek het die bestuur op Facebook gekontak en hy het my verseker dit was 'n glipsie. So kom dit toe dat ek so twee weke later weer daar aansit.

Hierdie keer bestel ek ek 'n Burger. Hulle menu vertel groot stories oor die burger en my gevoel is dat dit nie baie moeilik is om 'n goeie burger te maak nie. Ai tog ... weereens 'n terleurstelling. Die patty was suur en het al die tekens getoon van 'n patty wat te lank in die yskas rond gehang het. Sonder enige kommentaar is ek daar weg en besluit dat ek klaar is met die plek.

Biltong Carpaccio

So maand gelede besluit ek dat ons maar weer die Turn en Tender moet besoek. My gedagte is dat as die plek so lank oop bly moet daar iets in hulle kos steek.

Biltong en Chedder Focaccia

Die betrokke aand breek ek een van my goue reëls en bestel Steak. Ek beskou myself as 'n baie goeie Steak braaier en ek verouder my eie vleis vir enige iets van 30 to 120 dae. So my vrou weet goed dat ek basies geen eetplek vertrou met steak nie en om almal se aand te beskerm bestel ek dit nie by eetplekke nie.

Die steak kom by die tafel aan en onmiddelik merk ek dat daar bykans geen vet aan die vleis is nie. Alhoewel ek die Rump stert stuk bestel het en vir seker nie die "maer" opsie gevra het nie. Ek wil knor maar een kyk na Poppie en ek besluit om nie haar aand te bederf nie. Die steak was wel geurig en sag en redelik goed gaar, effens gaarder as wat ek verkies maar heeltemal aanvaarbaar.

Piri Piri Calamari

Toe ons in die kar klim reken ek ... Ok, ek het nou weer besef ek moenie steak by eetplekke bestel nie.

Heimlik besluit ek toe ek moet daardie menu deursoek ... iewers is daar sekerlik geregte wat maak dat mense na die plek toe bly terugkom.

Steak en Calamari Combo

So vir die volgende vier weke eet ons elke Vrydagaand daar en ek soek en soek. Poppie steek vas op die calamari en ek moet sê dit lyk smaaklik en die kere wat ek by haar geproe het was ek gladnie terleurgesteld nie. Maar nouja, die wat my ken weet ek skryf net oor die disse wat ek self geëet het.

Na die steak terleurstelling eet ek hulle Hoender Schnitzel en dit was heerlik. Goed gebraai en nie droog nie.

Crry Prawns

Die volgende week bestel ek drie voorgeregte ... Biltong Carpaccio, Kaas en biltong Focaccia en Calamri in Piri Piri. Dit was 'n heerlik maal, effens te veel vir my maar heerlik.

Gisteraand besluit ek toe om bietjie terug te sny en vat weer die Biltong Carpaccio en Kerrie Prawns. Weereens 'n heerlike ete vir my. Die prawns was "overcooked" maar die die Kerrie Sous het beslis baie smaak en geur. Vir my was die sous egter bietjie te souterig.

Poppie het hulle Steak en Calamari Combo geneem en dit het baie lekker gelyk. Sy eet haar vleis Medium Well en vir my was die tekstuur lekker sag maar te gaar. Dis egter 'n persoonlike smaak ding en die restaurant het nie veel daarmee te doen nie. Wat sy natuurlik baie waardeer is die "maer" opsie.

By die tafel langsaan het die man die Murgbene bestel en ek het om uitgevra oor dit. Dit het baie lekker gelyk en hy was baie in sy noppies met die smaak.

Daar was vir my so effense krapperige oomblik toe een van die bestuur my in die parkeer area uitvra oor my foto nemery van die eetplek. Die hele gesprek is nie belangrik nie maar ek het my nogal vervies, ek neem al vir jare STREET FOTOS en ek het maar net gewonder waar kom die besware vandaan. Maar nouja ... ek gaan maar my gang met kamera in die strate en steur my feitlik nooit aan die soort optredes nie. Ek wou meer atmosfeer fotos vir die storie geneem het maar het maar net weggeloop. Nie my verlies nie.

Ten slotte ... die atmosfeer is goed en die algemene geluide in die eetplek laat jou gemaklik voel en dis duidelik die gaste geniet hulle kos. Turn en Tender sal my sekerlik meer gereeld daar sien en ek is nuuskierig om hulle spyskaart verder te ondersoek.

Pryse is heel billik en ek is veral beindruk met die geur gehalte in die kos. Die diens is flink sonder dat die die kelners jou steur. Eendag sal ek maa rmy Grootseun Onderbroek aantrek en een van hulle vlagskip Steaks aanvat ... maar daar sal heelwat water in die see moet loop voor ek so waaghalsig raak. :)

Turn and Tender is in die Crossings Kompleks.

Eet lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Die van julle wat my ken weet sekerlik dat ek baie lief is vir skons. Oor die algemeen is ek redelik verdraagsaam met mense se gebakte goeters en sal nie sommer my bek rek nie ... wel, tensy dit regtig 'n patetiese flop is. Maar ... en dis 'n groot MAAR ... as dit by skons kom is ek vol draadwerk.

ManKos se Ouma se Skons

Die oorgrote meerderheid van die hedendaagse aanbiedinge is meer 'n "biscuit" as 'n skon en ek kan dit nie regtig verdra nie. Skons is in wese so eenvoudige ding om te bak maar so min mense doen die moeite om dit ordentlik te doen.

My ouma Hester se skons is die meetsnoer wat ek toepas en enige poging wat nie by haar standaard kan uitkom nie, is in my oë 'n flop.

Vir bykans 4 jaar het ek gesoek, gebak, geproe en dan maar weer gaan soek vir die geheim van haar skons. My ouma is dood en my ma is dood en ek kannie vra wat die geheim was nie. My familie kan onthou maar niemand weet nie. So is dit dat ek begin dink het dat die skons van Ouma Hester vir ewig verlore is vir my.

En toe so paar weke terug kom ek op 'n resep af ... sommer met die eerste oogopslag het die ding vir my reg gelyk. Laatnag en ek is in die kombuis. Meet en weeg, vryf en meng en bak. 40 minute later lê hulle op die draadrak ... lyk goed ... mooi gerys, mooi tekstuur en heerlike reuk.

Mooi tekstuur

Die eerste toets ... kan jy hom oopbreek dat hy perfek middeldeur breek sonder om 'n mes te gebruik ... wel, ek vat enetjie mooi vas en breek die kop af ... met genoegdoening sien ek hoe hy perfek uitmekaar skeur ... ja skeur. niks van 'n brekery nie. Wel dis een hekkie deur.

Volgende staar ek na die tekstuur ... lyk goed, gladnie koekerig of krummelrig nie. Dis die tweede toets.

Nou mond toe ... dit moenie droog wees nie ... en die een is reg.

Ek kou tydsaam en probeer elke dingetjie raak proe. Die een is goed, die beste van almal wat ek al gedoen het. Met genoegdoening vat ek nog 'n hap en kou terwyl ek vir my koffie maak. Die finale toets is natuurlik nog aan die kom want dis waar feitlik alles wat as skons aangebied word die kol heeltemal mis vir my. Daardie simpel bliksmaak wat die goed in jou mond agterlaat ... en ons almal blameer maar die bakpoeier vir dit ... en ek glo werklik dis dit.

Geen bliksmaak nie ... en ek glimlag breed terwyl ek nog een pleister met botter en so blerts Marmite.

Die een is goed maar hy is nie my ouma se skons nie en ek sak agter my rekenaar in. Hier het ek nou 'n ordentlike basis en dit gaan nou geduld en baie toets vat om by ouma se skons uit te kom. Vir die volgende drie weke werk ek aan die resep en vandag het ek die sesde variasie gebak. Nommer vyf was gister gedoen en hy was baie naby ... vanoggend het ek die finale verstelling gemaak en gebak ... en voorwaar ... ek staan in my ouma se kombuis en sien en proe weer haar skons. Presies soos haar skons, seker nie, maar so naby as wat ek daar aan kan kom.

Ai hoe wens ek dat ek vanoggend vir my ma een of twee kon gee saam met 'n koppie tee.

Nouja ... ek gaan nou die resep met julle deel en anders as gewoonlik gaan ek geen alternatiewe aanbied nie ... maak presies soos die resep of los dit uit.

Varkvet in die meel

BESTANDELE:
275g Koekmeel ... ek gebruik Millstone se koekmeel.
1 tsp Koeksoda ... en moenie Bakpoeier gebruik nie.
1 tsp Kremetart
1 tsp Strooi suiker
½ tsp Sout
60g Varkvet ... ek koop myne by ESKORT se winkel.
150gr Dubbelroom Yogurt.

Reg vir die drukker

1 Groot eier
+Eggwash.
METODE
1. Oond op 220°C en smeer 'n bakplaat. Ek gebruik sommer die sproei.
2. Klits die meel, sout, koeksoda, strooisuiker en kremetart goed met 'n whisk. Gebruik 'n groot mengbak.
3. Sit die varkvet in die meel. Ek druk dit so plat as moontlik bo-op die meel voordat ek dit met my vingerpunte begin opbreek in die meel.

Mooi Baksel

4. Klits die eier en yogurt saam en gooi in by die meel mengsel. Nou gebruik ek 'n kombuismes om die meel en yogurt saam te laat meng. Doen dit die heeltyd met sny bewegings. Jy moenie die mengery met jou hande doen nie want dan gaan jy die meelmengsel oorwerk en brood begin maak. Hou aan met die sny bewegings todat alles mooi gemeng is. Druk die deeg nou liggies bymekaar om 'n bal te vorm.

Heerlik met konfyt en room

5. Strooi jou werksblad liggies met meel en druk die deeg ligges plat met jou hande in 'n ovaal van omtrent 25mm dik (so om en by vingerdikte) As jy a 60mm drukker gebruik behoort jy so 6 mooies uit te kry. Maak die oorskiet bymekaar en druk saggies weer in 'n plat sirkel ... onthou, ek noem die weeskinders, hulle gaan nie meer soos die eerstes wees nie. Na die drukkery druk ek die oorskiet sommer in so langwerpige vryhand vorm. Die is belangrik want elke keer as jy die deeg bymekaar maak word die skon minder skon en meer "biscuit".
6. Pak hulle redelik naby aan mekaar op die bakplaat. Ek verf myne met geklitsde eier. Wees versigtig dat jy slegs die koppe verf. As die eier langs die skon afloop gaan hy nie mooi uitrys nie want die eier word vinnig hard en hou die skon vas. Ek hou daarvan om een of ander braaispesey mengel oor te strooi.
Bak nou vir 12 minute in die 220C oond met die rak in die middel.
Haal uit en plaas op a draad rakkie dat dit effe afkoel voor jy wegval.

Daar is hy ... maak dit en kom vertel my wat jy dink.

PS ... As jy meer wil maak, verdubbel maar die resep.

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Saterdagoggend 7 Julie 2018 skrik ek wakker ... jip, skrik is die regte woord. Dis 05h15 en nog nag. Vir my is dit 'n ongoddelike tyd om op te staan en ek kreun terwyl ek myself sit maak op die kant van die bed. Ons het baie voorbereiding gedoen vir die kompetisie in Sabie maar ek voel hondsleg. Dinsdag teen sononder het my neus begin brand en spoedig het ek geweet dat sulke tyd is ... grieptyd en die moerigheid begin prut in my. Tenspyte van medikasie en wat nog voel ek maar kakkerig vanoggend.

Tafel is gedek

Met 'n ernstige snuif kies ek koers badkamer toe. Vyftien minute later staan ek in die kombuis en staar deur die venster terwyl ek wag dat die ketel moet kook. Dis nog donker buite so ek weet nie hoe die weer lyk nie maar die termometer dui aan dat dit 'n skamele 7C in die tuin is. Nou vir die res van die land is dit warm maar vir ons Laevelders is dit koud.

Jedske en Wiehann en die Kaiingpot

Vanoggend het die koffie nie regtig 'n uitwerking op my nie en ek mompel aanhoudend terwyl ek vir die laaste keer deur my kontrolelysie gaan.

Net na 06h30 daag Wiehann en Jedske op en ons laai die bakkie. Dis nou darem al mooi lig en ek kan sien daar is dik wolke in die suidweste. Die twee jonges is baie opgewonde oor die dag se uitdaging en ek is maar stil en stemmig. In my kop maal die resepte en die tydsberekeninge en ek kyk in die pad sonder om regtig iets te sien.

Net na 07h30 draai ons in die parkeerterrein in by Loggers Pub en Grill ... daar staan alreeds so paar gazebos en ons soek vir ons 'n gepaste staanplekkie. Dis bewolk en koel maar gelukkig geen noemenswaardige wind nie.

Johan en Zaan en die Broodpot

Soos 'n goed geoliede masjien spring ons aan die werk en voor agtuur staan ons gazebo, is die braaiers opgestel en die tafels gedek.

Wiehann is in beheer van die kaiingpot en hy moet so spoedig as moontlik aan die gang kom. Sy pot doen ook die Varkvel Krakers en die Vetkoekies. Hy moet ook die Buffalo Bacon Bits afrond in die varkvet.

Johan is in beheer van broodbakkery en Zaan staan hom by. Hy gaan 'n besige dag met die broodpot hê en weinig kans kry om te ontspan.

Ek doen die hoofpot, Gemmer Varkpens en Jedske staan my by. Zaan en Jedske help ook met die tafel vir die beoordeelaars.

My spanmaats

Elke lid van die span het sy spesifieke take en verantwoordelikhede en almal weet presies wat van hom of haar verwag word. Ons het vrede gemaak met die feit dat die ManKos span nie sommer die prys vir die beste GEES sal wen nie want ons is heeltemal te besig om te kook ... en dis ook reg so vir ons almal ... vir ons gaan alles oor die finale opdiening. Dit moet net die beste wees ... niks minder nie.

Beoordeling

By die middel van die dag prut die potte mooi en die kaiingbak en broodmandjie begin vol raak. Ek voel steeds maar olik maar die dinge loop mooi. Natuurlik befoeter die snotterigheid my smaak vermoë en ek moet sterk staatmaak op my spanmaats om my te lei met die geur van ons disse.

En toe is dit sulke tyd ... 15h15 en die beoordeelaars stap in ons plekkie in. Ons tema vandag is DIE VARK in die Verhaal. Ek lees vir hulle ons Spyskaart Storie en toe staan ons terug en kyk ... reg om vrae te antwoord maar eenkant ... die mense moet tyd kry om te proe, dink en weer te proe. Die algemene opmerkings en die bree glimlagte laat my goed voel. #ManKos span het weereens 'n meesterstuk opgedien.

Teen skemeraand is dit die prysuitdeling en ek is trots om te sê dat die #ManKos Potjiekos Span het hulle goed van hulle taak gekwyt ... Die Wenners van die Loggers Pub en Grill 2018 Potjiekos Kompetisie.

Dankie aan die organiseerders, die beoordeelaars en 'n groot dankie aan my spanmaats ... welgedaan manne en meisies ... julle is tops.

Spesiale dank aan #ManKos se Borge ...

1. ESKORT Butchery Mbombela
2. Corporate Collect
3. Tripwired Clothing
4. ACS Security


Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Potjiekos ... dis 'n ding wat baie mense laat glimlag maar dis ook iets wat baie mense laat frons. Die algemene opinie rondom die tipe kosmaak is dat dinge net ingemoer word en dat die pot basies na homself sal kyk. Dis 'n langdradige proses en in die meeste gevalle net 'n goeie verskoning om te kuier.

Die manne staan bont

So tydjie terug het ek die vraag gevra ... Wat is vir jou lekker van 'n potjie en wat kan jy gladnie verdra nie ?
Wel daar was letterlik dosyne antwoorde en elke antwoord het basies dit bevestig wat ek altyd vermoed het. Laat ek dit net duidelik stel, ek het nog nooit in my lewe werklik 'n potjie gemaak nie ... hoofsaaklik omdat die proses in sy gewilde vorm, gladnie sin maak vir my nie en die resultate is normaalweg maar baie middel van die pad.

Die pot prut

So paar weke gelede nader my seun en twee van sy vriende my en vra of ek wil deel word van hulle potjiekos span wat gaan inskryf vir die Canarywalk Corporate Challenge in Nelspruit. Hulle wou dit graag onder die ManKos vaandel doen. Ek het so rukkie geluister na hulle stories en toe besluit ek ... Hoekom nie, miskien is dit tyd dat ManKos sy toon in die kompetisie wêreld insteek.

Vars broodjies uit die oond

Potjiekos is 'n erg tipiese Suid Afrikaanse benaming maar die werklike kookproses is wêreldwyd bekend. Die vernaamste verskil tssen Potjiekos en 'n Bredie is die feit dat die potjie uit duidelik onderskeibare lagies bestaan waar 'n bredie maar
'n mengelmoes is.

Die volgende paar aande reis ek deur kombuise op Youtube en soek vir iets wat nie net uiters smaaklik gaan wees nie maar ook iets wat nogal kan uitstaan.



En so word die ManKos Varkpens Potjie gebore.

'n Potjie sonder maniere ... hy verlei jou en bederf jou sonder om skaam te kry.

Dan roep hy nog sy vriende ook in om jou verleiding tot die uiterste te dryf ... Kaiings, varkvel krakers en as jy nou genoeg gekneus is dan offer hy jou 'n broodjie met romerige plaasbotter as salfies vir jou bederfie.

Brosgebraaide kaiings

Moet net nie vir jou vrou vertel hoe jy hier gekafoefel het nie ... sy sal nie verstaan nie.

Wees gewaarsku ... daai groot glimlag en vetring om jou bek gaan jou weggee.

Ek drie proeflopies gedoen en toe is ek tevrede.

Kos is op die tafel.

En toe breek die groot dag aan. Saterdagoggend 16 Junie 2018. Ek glo dit was 'n ondervinding vir my 3 spanmaats, Wiehann, Janus en Johan ... ek dink hulle verwagting was 'n dag van pret en jol om die vure rond maar die ouman het ander planne gehad ... net die beste moet gelewer word en geen tyd vir speletjies nie. Ek het so hier en daar opmerkings opgevang wat woorde soos "slawedrywer" "army korporaal" en "blixem" ingesluit het ... die sweet het getap en die manne het gefokus en uiteindelik toe die beoordeling moet gebeur het almal rustig gestaan en geweet ... die Varkpot is goed.

ManKos Potjiekos span het die eerste plek gekry vir die Beste Stalletjie en het tweede gekom met die potjie self. Nie sleg vir 'n eerste maal nie. Daar was 35 spanne wat meegeding het.

Ons oorweeg nou om gereeld aan sule kompetisies deel te neem.


Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

As daar nou een ding is wat werklik ManKos is, dan is dit 'n pasteitjie. Baie min mans sê nee dankie vir 'n pasteitjie. Soos ek verduidelik het toe ek die basiese Skon storie vertel het, kry die skon ding onder die knie en jy kan baie ander lekker eetgoedjies maak.

ManKos Pasteitjie

Wel vandag maak ons pasteitjies met skon deeg. Die VLU tannies gaan nou natuurlik frons en die Koekedoor mense gaan net hulle koppe skud ... maar nouja ... dis soos ek is ... ek soek die maklike paadjies.

Hierdie twee stories is belangrik as jy die resep wil maak ...

1. Basiese ManKos Skon Deeg
2. Vlenter Vark

Kry jou oond lekker warm ... so 210C ... rakkie in die middel.

Moenie teveel vulsel insit nie

Begin en maak my Basiese Skon mengsel aan. Hierdie keer gaan jy bietjie harder met die deeg werk want jy soek dit nie fluffy nie maar wel bros en bietjie harder. En dit alles kry jy reg deur die deeg so bietjie brei.

Jy het ook een of ander vulsel nodig ... hoender, vis, wors, maalvleis ... ek het my Vlenter Vark gebruik.

Smeer 'n 6 gat groot muffin pan mooi en deel jou deeg in 6 ewegroot porsies. rol die balletjie deeg lekker tussen jou hande druk hom dan plat in 'n sirkel. As jy dit kleiner wil doen kan jy die 12 gat muffin pan gebruik en net die deeg in 12 verdeel.

12 minute in die oond

Sit nou die skyfie in die muffinpan en druk die deeg dun uit. die deeg sal teen die rant opklim tot omtrent amper bo. Doen al ses ... dit vat bietjie tyd. As jy klaar is begin weer by die eerste een en druk weer plat, die deeg begin rys so jy moet dit weer plat druk. Nou skep ek so twee eetlepels vulsel in. Dis baie belangrik dat die vulsel gaar en koud is. Moenie te nat vulsel gebruik nie. En moenie teveel vulsel insit nie.

Laastens sit ek 'n lekker skyf kaas bo-op soos 'n deksel ... strooi bietjie spesery oor en dan in die oond in.

Lekker korsie

Hierdie pasteitjies is gewoonlik reg so tussen 10 en 12 minute. Onthou die skon deeg is baie dun uitgedruk en die vulsel is reeds gaar. Maar moenie met 'n koue oond sukkel nie.

Hou maar 'n ogie op die baksel, dit kan maklik brand. Die deeg is dun en die oond is baie warm.

Hierdie pasteitjies kan jy maklik weer warm maak in die mikrogolf oond sonder dat die deeg taai word.

Hierdie is regte ManKos pasteitjies en enige man behoort dit maklik te kan maak. Die deeg is nie vol nonsens nie en werk maklik. Jy hoef ook nie te stress dat jy dit sal oorwerk nie. As jou vulsel reg is dan behoort die proses jou nie langer as 30 minute van begin tot in die bord te neem nie.


Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Dit is tog vreemd hoe mens elke dag by 'n plek verbystap en dink, ek moet eendag tog hier gaan inloer en dan stap jy net verder aan. So kom en gaan die dae verby en die voorneme is altyd daar maar jy gaan nie oor tot die instap nie.

Bistro Bistro

Bistro Bistro by Steiltes SPAR Sentrum is so plekkie vir my. Dis nou al 'n geruime tyd dat ek die plek sien en altyd dink dat ek tog daar moet gaan eet ... maar dis waar dit gebly het.

Gister, Vrydag, sit ek in my kantoor en my vrou vra my ... "Waar gaan ons eet vanaand?"

Vir so paar oomblikke wonder ek en toe sê ek ... "Kom ons gaan probeer Bistro Bistro."

Sterk skemer kom ons by die plek aan en word by die deur verwelkom.

Lisinda wys ons tafel aan en ek en my gaste kom tot rus. Vier volwassenes en een kind. Niemand van ons het al hier geëet nie en ek sien nogal uit na die aand.

Die diens is flink en spoedig het elkeen ietsie om te drink en ons begin die spyskaart deurkyk.

Feestelik

Ek kyk vir my vrou ... "Poppie, dit gaan my 'n tydjie besig hou om deur die spyskaart te eet."

Gesellig

Sy grinnik net ... "Kyk maar eers of jy van die kos hou." ... sy ken my te goed.

Twee van ons kies die Hoenderlewer Pate en ek besluit op die Steak Tartare ... ek is baie lief vir rou vleis, ek het dit geleer eet in die Kuwait. Maar ek het my rieme al soveel keer styfgeloop hier dat ek dit nie meer maklik bestel nie. Vanaand voel ek egter waaghalsig en bestel die dis.

Hoender Lewer Pate

Ons bestel 'n Kiddies Pizza vir die dogtertjie en gesels lekker tot die disse opdaag. Dit lyk baie smaaklik en toe word dit stil om die tafel.

Die twee dames met die Lewer Pate is duidelik hoog in hulle noppies en ek smul aan die Steak Tartare.

Wat 'n heerlike en smaakvolle dis. Die geur en smaak is perfek vir my en ek gaan my nou verstout en sê dat dit die beste Steak Tartare is wat ek al ooit geëet het.

Steak Tartare

Vir die hoofgereg bestel ons Beer Battered Hake, een met slaai en een met chips.

Een pasta, prawns en squid.

Ek bestel die Special of the Day ...

Wildsvleis Pastei met Chips en groen slaai.

Pasta

Weereens is die disse pragtig opgedien en dit lyk smaaklik.

Die Wildsvleis pastei is heerlik, die kors is vlokkerig en bros en die vleis is sag en sappig.

Daar is 'n heerlike ryk sous apart en ek het dit mildelik oor die pastei gegiet.

Vis en slaai

Die chips is lekker bros, soos ek daarvan hou en die groen slaai is 'n goeie mengsel. Dit is iets wat ek deesdae baie geniet saam met my maaltye, so gemengde groen slaai. Die sousie waarmee die blare gebaai is, was lekker, nie oormatig gegeur nie en ek kon die blare se verskillende smake goed proe.

Die algemene gevoel oor die vis was dat dit lekker is maar effe olierig.

Wildsvleis Pastei

Die pasta dis was heerlik maar die porsie was groot vir die dame en sy het die res saamgeneem huistoe om later te eet.

Bistro Bistro sal my vir seker weer sien en die keer sal ek iets ligter bestel sodat ek by die nagereg ook kan uitkom.

Komplimente aan die chef en die bestuur. Dit was 'n heerlike aand en ek is gelukkig huistoe.

Bistro Bistro is in die Steiltes SPAR Kompleks en ek het die geskryf na aanleiding van my besoek daar op Vrydag 18 Mei 2018.

Die pryse is billik en ek voel dat dit vir my goeie waarde gegee het.


Eet lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.