Vrydag, 25 Mei 2018

Skons - Maklike pasteitjies

As daar nou een ding is wat werklik ManKos is, dan is dit 'n pasteitjie. Baie min mans sê nee dankie vir 'n pasteitjie. Soos ek verduidelik het toe ek die basiese Skon storie vertel het, kry die skon ding onder die knie en jy kan baie ander lekker eetgoedjies maak.

ManKos Pasteitjie
Wel vandag maak ons pasteitjies met skon deeg. Die VLU tannies gaan nou natuurlik frons en die Koekedoor mense gaan net hulle koppe skud ... maar nouja ... dis soos ek is ... ek soek die maklike paadjies.

Hierdie twee stories is belangrik as jy die resep wil maak ...

1. Basiese ManKos Skon Deeg
2. Vlenter Vark

Kry jou oond lekker warm ... so 210C ... rakkie in die middel.

Moenie teveel vulsel insit nie
Begin en maak my Basiese Skon mengsel aan. Hierdie keer gaan jy bietjie harder met die deeg werk want jy soek dit nie fluffy nie maar wel bros en bietjie harder. En dit alles kry jy reg deur die deeg so bietjie brei.

Jy het ook een of ander vulsel nodig ... hoender, vis, wors, maalvleis ... ek het my Vlenter Vark gebruik.

Smeer 'n 6 gat groot muffin pan mooi en deel jou deeg in 6 ewegroot porsies. rol die balletjie deeg lekker tussen jou hande druk hom dan plat in 'n sirkel. As jy dit kleiner wil doen kan jy die 12 gat muffin pan gebruik en net die deeg in 12 verdeel.

12 minute in die oond
Sit nou die skyfie in die muffinpan en druk die deeg dun uit. die deeg sal teen die rant opklim tot omtrent amper bo. Doen al ses ... dit vat bietjie tyd. As jy klaar is begin weer by die eerste een en druk weer plat, die deeg begin rys so jy moet dit weer plat druk. Nou skep ek so twee eetlepels vulsel in. Dis baie belangrik dat die vulsel gaar en koud is. Moenie te nat vulsel gebruik nie. En moenie teveel vulsel insit nie.

Laastens sit ek 'n lekker skyf kaas bo-op soos 'n deksel ... strooi bietjie spesery oor en dan in die oond in.

Lekker korsie
Hierdie pasteitjies is gewoonlik reg so tussen 10 en 12 minute. Onthou die skon deeg is baie dun uitgedruk en die vulsel is reeds gaar. Maar moenie met 'n koue oond sukkel nie.

Hou maar 'n ogie op die baksel, dit kan maklik brand. Die deeg is dun en die oond is baie warm.

Hierdie pasteitjies kan jy maklik weer warm maak in die mikrogolf oond sonder dat die deeg taai word.

Hierdie is regte ManKos pasteitjies en enige man behoort dit maklik te kan maak. Die deeg is nie vol nonsens nie en werk maklik. Jy hoef ook nie te stress dat jy dit sal oorwerk nie. As jou vulsel reg is dan behoort die proses jou nie langer as 30 minute van begin tot in die bord te neem nie.


Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Saterdag, 19 Mei 2018

Eetplek - Bistro Bistro in Nelspruit

Dit is tog vreemd hoe mens elke dag by 'n plek verbystap en dink, ek moet eendag tog hier gaan inloer en dan stap jy net verder aan. So kom en gaan die dae verby en die voorneme is altyd daar maar jy gaan nie oor tot die instap nie.

Bistro Bistro
Bistro Bistro by Steiltes SPAR Sentrum is so plekkie vir my. Dis nou al 'n geruime tyd dat ek die plek sien en altyd dink dat ek tog daar moet gaan eet ... maar dis waar dit gebly het.

Gister, Vrydag, sit ek in my kantoor en my vrou vra my ... "Waar gaan ons eet vanaand?"

Vir so paar oomblikke wonder ek en toe sê ek ... "Kom ons gaan probeer Bistro Bistro."

Sterk skemer kom ons by die plek aan en word by die deur verwelkom.

Lisinda wys ons tafel aan en ek en my gaste kom tot rus. Vier volwassenes en een kind. Niemand van ons het al hier geëet nie en ek sien nogal uit na die aand.

Die diens is flink en spoedig het elkeen ietsie om te drink en ons begin die spyskaart deurkyk.

Feestelik

Ek kyk vir my vrou ... "Poppie, dit gaan my 'n tydjie besig hou om deur die spyskaart te eet."


Gesellig
Sy grinnik net ... "Kyk maar eers of jy van die kos hou." ... sy ken my te goed.

Twee van ons kies die Hoenderlewer Pate en ek besluit op die Steak Tartare ... ek is baie lief vir rou vleis, ek het dit geleer eet in die Kuwait. Maar ek het my rieme al soveel keer styfgeloop hier dat ek dit nie meer maklik bestel nie. Vanaand voel ek egter waaghalsig en bestel die dis.
Hoender Lewer Pate
Ons bestel 'n Kiddies Pizza vir die dogtertjie en gesels lekker tot die disse opdaag. Dit lyk baie smaaklik en toe word dit stil om die tafel.

Die twee dames met die Lewer Pate is duidelik hoog in hulle noppies en ek smul aan die Steak Tartare.

Wat 'n heerlike en smaakvolle dis. Die geur en smaak is perfek vir my en ek gaan my nou verstout en sê dat dit die beste Steak Tartare is wat ek al ooit geëet het.
Steak Tartare
Vir die hoofgereg bestel ons Beer Battered Hake, een met slaai en een met chips.

Een pasta, prawns en squid.

Ek bestel die Special of the Day ...

Wildsvleis Pastei met Chips en groen slaai.

Pasta
Weereens is die disse pragtig opgedien en dit lyk smaaklik.

Die Wildsvleis pastei is heerlik, die kors is vlokkerig en bros en die vleis is sag en sappig.

Daar is 'n heerlike ryk sous apart en ek het dit mildelik oor die pastei gegiet.

Vis en slaai
Die chips is lekker bros, soos ek daarvan hou en die groen slaai is 'n goeie mengsel. Dit is iets wat ek deesdae baie geniet saam met my maaltye, so gemengde groen slaai. Die sousie waarmee die blare gebaai is, was lekker, nie oormatig gegeur nie en ek kon die blare se verskillende smake goed proe.

Die algemene gevoel oor die vis was dat dit lekker is maar effe olierig.

Wildsvleis Pastei
Die pasta dis was heerlik maar die porsie was groot vir die dame en sy het die res saamgeneem huistoe om later te eet.

Bistro Bistro sal my vir seker weer sien en die keer sal ek iets ligter bestel sodat ek by die nagereg ook kan uitkom.

Komplimente aan die chef en die bestuur. Dit was 'n heerlike aand en ek is gelukkig huistoe.

Bistro Bistro is in die Steiltes SPAR Kompleks en ek het die geskryf na aanleiding van my besoek daar op Vrydag 18 Mei 2018.

Die pryse is billik en ek voel dat dit vir my goeie waarde gegee het.


Eet lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.


Vark - Vlentertjies is Spotgoedkoop

Ek het lanklaas oor die ding van goedkoper kos gepraat. Dis iets wat my na aan die hart lê en ek is deesdae geweldig pryssensitief as ek disse beplan.

Bulk pak Varbene
Vandag wil ek julle vertel van die ESKORT MEATY BONES. Hier by my Varkwinkel in Nelspruit is dit weggesteek agter in die winkel waar die koppe en pote in groot pakke aangebied word. Met die eerste oogopslag dan wonder mens erg oor wat is nou eintlik in die sak en dis heel normaal om maar verby te hou. Ek is egter nogal 'n nuuskierige mens en ek is ook nie bang om iets vir 'n eerste keer te probeer nie.

Klaar gekook
Sowat 18 maande terug het ek my eerste ontmoeting met die 2kg sak Meaty Bones gehad. Sedertdien het ek dit nog drie maal gekoop en twee van my vriende het dit ook gewaag om die sak bene te koop. Ek het mooi rekord gehou van ons almal se ervaring en vandag kan ek met sekerheid sê dat daar tussen 800 en 1,000 gram vleis aan daardie bene sit. So teen die huidige prys van R49.00 vir die 2kg sak is dit dus om en by R49.00kg vir die vleis.

Heerlike vlentertjies
Wat belangrik is om te weet is dat dit werklik hoë gehalte vleis is. Wat jy in die sak kry is hoofsaaklik rugstring bene wat natuurlik uitval is waneer die duur snitte van die bene afgesny word.

Nou so maak ek ...

Sop
1. Gooi die bene in my stoompot met 'n groot ui wat in stukke gekap word en twee wortels. Dan maak ek 500ml van Ina Paarman se "stock" aan. Ek gebruik of die Hoender sop of Groente sop poeier. Dis die in die boepens botteltjies. So twee opgehoopte teelepels op 500ml water.

2. Nou kook ek die bene vir 50 minute.

3. Haal die bene uit en laat effe afkoel. Dan skraap ek soveel as moontlik van die vleisies af en kook die bene weer vir 20 minute in die stoompot. Nou skraap ek die bene baie skoon.

Pastei
4. Die water sous wat in die stoompot is gebruik ek vir die maak van sop en ek gooi so 100gr van die vlentertjies ook in die sop.

Waarmee jy nou opeindig is 'n bak vol heerlike vark vlentertjies wat ek gebruik in bredies, sop, pasteie en herders pasteie.

Ek en my vrou kry gemiddeld so 4 maaltye uit die bak vleisies uit plus die aanvanklike sop.
Bredie
Nouja na my mening is dit 'n groot winskoop. 10 borde kos waar die proteien ongeveer R5.00 per bord is.

Gaan kyk bietjie by die ESKORT winkel en probeer dit gerus.

Die vlentertjies is baie veelsydig en jy kan ook frikkadelle, krokette en patties met dit maak. Daar is so baie dinge waarvoor die vleisies kan aanwend maar die belangrikste is steeds die feit dat jy baie min betaal vir baie goeie varkvleisies.

Ek dink deur net so bietjie te sit en mooi te dink oor wat ons wil maak kan ons nogal lekker eet sonder om duur te betaal daarvoor.

As jy nie 'n stoompot het nie kan jy die bene in 'n oondpan pak met dieselfde goed as wat ek in die stoompot sit. Maak toe met blinkpapier en sit in die oond teen so 110C vir die nag. Die volgende oggend het jy 'n pan vol heerlikheid.

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Maandag, 12 Maart 2018

Mieliepap - Korsies met styl

Ons boerenasie is oor die algemeen groot papeters en vir baie van ons is die brandsel byna onweerstaanbaar.

ManKos Papkorsies
Om 'n goeie brandsel in die pot te kry verg so bietjie vaardigheid en baie geduld ... maar as jy dit eers reggekry het dan is dit die groot rede hoekom jy pap maak. Daardie stukkie bros brandsel met suiker, botter, room, kaiings ... net wat jy wil ... die krakende kouery en die die vingers aflekkery ... dis mos ManKos.

Nouja om 'n goeie brandsel te kry is daar so paar punte van belang ...
1. 'n Lekker swaar pot.
2. 'n Goeie skep botter in die kokende water voor jy die meel ingooi.
3. 'n Ordentlike tweetand vurk om die pap mee te roer. Moenie die kors breek as jy roer nie.
4. Baie geduld. 'n Oordentlike kors word op 'n stadige hitte gebou. 90 minute minimum.

Maar nouja vandag se storie gaan oor die maak van die kors sonder om 'n pot pap te maak.

Die resep wat ek gebruik is eenvoudig en ek gebruik Plaasjapie se growwe braaipap meel. As jy gewone meel gebruik moet jy die water so bietjie verminder.

Bestandele:

1/2 koppie growwe pap meel.
1 en 1/2 koppie water.
1/4 teelepel sout.
1 goeie eetlepel botter - Moenie snoep wees met dit nie.

Hierdie mengsel is net genoeg vir die maak van 12 korsies in 'n muffin pan.

Metode:

Na mikrogolf sessies
Meng alles in 'n glas mengbak. Moenie bekommerd wees oor die meel wat nie in die water inmeng nie. Sit nou vir 1 minuut in die mikrogolf oond op hoog. Roer weer met 'n vurk en terug in die mikrogolf oond. Herhaal die proses so 3 of 4 maal. Nou sal jy sien dat jy 'n redelike stewige pasta het. As daar nog vry water in die bak is moet jy maar aanhou met die mikrogolf ding tot dit alles weg is. Die krag van jou oond speel 'n rol en die tipe meel wat jy gebruik.
Verdeel mooi in muffin pan

As jy nie 'n mikrogolf oond het nie, kook die mengsel in a potjie terwyl jy dit die heeltyd roer. Dis belangrik om die pap naby aan gaar te kry voor dit in die oond ingaan.

Skep nou met 'n eetlepel in die gaatjies van 'n muffin pan. Probeer om redelik akkuraat te verdeel want as jy dit oneweredig verdeel gaan party begin brand voor die dikker korsies reg is.

Bak tot goudbruin
Sit nou die pan in 'n 150C oond. Hier sal jy maar moet eksperimenteer want alle oonde is nie dieselfde nie.

Wees maar geduldig ... na sowat 40 minute behoort die korsies te begin kleur wys ... moenie oorhaastig raak nie.

Groot maat
Vanaf sowat 45 minute moet jy maar gereeld kyk en haal maar die korsies uit wat lekker bruin gebak het ... die kans is groot dat almal nie presies gelyk reg gaan wees nie.

As jy groter maat wil doen kan jy die resep verdubbel of meer ... hou die verhoudings reg. Druk dit mooi dun uit in 'n bakpan en sny mooi in blokkies. Ek gebruik a pizza cutter vir dit. Soos met die muffin pan moet jy dit maar mooi dop hou en sodra dit begin mooi kleur kry moet jy die uithaal wat reg is.

Ek het die resep 3x gemaak en die laaste keer het ek te min botter ingesit ... dis 'n fout.

Gebruik die korsies vir byna enige vingerhappie ... soet of sout.

Dit hou goed in 'n lugdigte houer maar smaak nie meer lekker na 'n dag nie.


Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Saterdag, 24 Februarie 2018

ManKos - Aartappelslaai met houding

Aartappelslaai is iets wat meeste mense van hou. Dit is ook dan so dat ons mense aartappelslaai ken as blokkies of skyfies aartappel wat gesmoor word met mayonnaise en kondensmelk in een of ander verhouding en die resultaat wissel van soet tot suur afhangende van die verhoudings.

Daar word sout, peper en 'n horde ander speserye bygevoeg na smaak of volgens oorlewering. Al wat nog kort is gherkins, suur uie, rissies en wat nog meer ... en natuurlik die tradisionele vereiste ... gekookte eiers, gekap, geskyf of gekrummel.

Aartappelslaai en Wors
En dit is wat die meeste van ons ken as aartappelslaai ... en dit wissel van lekker tot walglik, afhangende van die eters. Ek kan nog verder gaan en verduidelik dat dit van warm tot yskoud opgedis word, aartapples van bros tot glasig en die eiers van helder geel tot blou. Die byvoegings kan strepe waterigheid of klonte verdikte mayonnaise insluit in die resultate, om van die reuk nie eers te praat nie.

Een groot voordeel van die hordes Kos Programme op Televisie is dat ons blootgestel word aan baie onbekende dinge. So is dit ook dan dat ek op 'n dag sit en kyk na 'n program en die meise reken sy gaan BBQ Chicken maak met Potato Salad. Ek steek 'n sigaret aan en sak terug in my stoel ... dit wil ek sien.

Groot was my verbasing toe ek sien daar is nêrens mayonnaise of kondensmelk op die werksblad nie.

Hier is wat ek gedoen het na die program en dit was heerlik.

Stoom twee middelslag aartappels, jy kan dit kook ook. Maak dit goed gaar.

Sny in wedges en deel elke wedge weer in drie. Jy soek lekker bytgrootte blokkies.

Jy kan dit met die skil of sonder die skil doen.

Nou in glasbak ...

2x Eetlepels Olyfolie.
1x Eetlepel Botter
1x Teelepel lekker Chili Sous. (Jy kan meer maak as jy wil.)
Sout en growwe peper na smaak.
Chili Flakes na smaak.
1x Eetlepel chutney van jou keuse.

Geurig en lekker
Roer goed en sit in die mikrogolf vir so 30 tot 45 sekondes. Jy wil die mengsel lekker warm hê.

Klits dit nou goed met 'n draadklitser.

Gooi die aartappel stukkies in die glasbak en roer goed deurmekaar.

Bedien warm met so bietjie paprika bo-oor.

En daar het jy nou 'n nuwe variasie van aartappelslaai wat heerlik is saam met braaivleis.

Natuurlik kan jy die ding uitbrei na hartelus maar die kern is en bly ... niks mayonnaise of kondensmelk nie. Ook niks eiers nie.

Probeer dit gerus, die is die beste as dit warm bedien word.


Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Maandag, 12 Februarie 2018

Bees - Beesstert bly darem lekker

Daar is baie mense wat sommer dadelik aan die ril gaan as jy net die woord afval noem en daar is ook baie mense wat gladnie beesstert koop nie ... maar ek het ook al gesien hoe dieselfde mense gretiglik skep as daar 'n beesstert potjie iewers gemaak word.

So tydjie terug het Foodlovers Market 'n spesiale aanbod op Beesstert - 69.00 / kg. Na twee mislukte besoeke kry ek toe op die laaste dag darem 'n kans.

Ek sien op die pak dat die vleis kom van Argentinië af ... en terwyl ek die pakkie se etiket lees verdwyn omtrent 70% van die pakkies uit die yskas in trollies in. Een man langs my laai twee trollies vol.

Ons is baie lief vir beesstert maar genade die goed het darem duur geword en ek pak met mening in my mandjie in.

Tradisonele Beesstert
Tuis gekom en ek meng my tradisionele "afspoel" water in 'n mengbak. Poppie staan my en aankyk terwyl ek elke pakkie mooi afvee met 'n vadoek wat ek in die bakkie water nat maak. Water, bietjie Jik en so blerts suurlemoensap. Ek gee nie om oor wat sy dink nie maar dis hoe my ma my geleer het en ek is nogal gatvas oor kieme in my kos.

Twee stapeltjies van vier en een weeskind. Ek pak die agt pakkies in die vrieskas en glimlag ... vir die afsienbare toekoms hoef ek nie weer te knor oor duur beesstert nie.

Die weeskind gaan yskas toe ... dit gaan Sondag se ete word.

Sondag so by die middel van die dag is dit tyd vir ek en die beesstert. Ek trek 'n lekker ysterpan nader en maak vuur onder hom. Mense berei beesstert op basies twee maniere voor ... Vaal Stert waar die stert in 'n pot gegooi word en saam allerhande dinge gekook word tot hy sag is of ... jy braai die stert stukke in 'n lekker warm pan of pot dat dit sulke mooi bruin korsies maak. Vandag doen ek die braai eers en kook later ding.

Ek braai so paar stukke op 'n slag tot mooi goudbrun en toe plaas ek dit in my stoompot. Grof gekapte uie en wortels en drie medium aartappels so met skil en al. Ek kook altyd die aartappels so in die stoompot as ek 'n bredie gaan maak want daai stoomgekookte aartappel help om die sous te verdik want dit val uitmekaar in die finale stadium. Twee hooggehoopte lepels van Ina Paarman se Vegetable Stock poeier en grofgemaalde peper. Nou gooi ek so twee koppies water in.

Dan laat ek tegnologie maar sy ding doen, ek gebruik 'n AEG Elektriese stoompot ... daai goed wat op die stoof moet staan vervul my met angs en vrees. As jy nie 'n drukkoker het nie kan jy die aanvanklike proses in 'n oondbak doen met 'n deksel en dit vir 3 ure op 140C laat bak.

Natuurlik kan jy die hele proses ook in 'n potjie op die vuur doen.

50 minute later slaan die pot oor na "WARMING" toe en ek laat dit maar staan. Dis skrams na 14h00 en nog te vroeg vir aandete.

Teen 16h00 begin ek met die afronding ... ek bou 'n lekker basis vir 'n goeie sous in 'n ysterpot ... braai uie in varkvet, voeg gemaalde peper en "roasted masala" by en toe koekmeel om 'n lekker pasta te vorm. Ek gooi die aftreksel af  uit die stoompot en gooi dit oor die sousbasis. Roer verwoed met 'n sterk metaallepel en maak seker ek skraap elke stukkie aanpaksel van die pot bodem af los. Weldra kalmeer die woeste kokery en ek sien hoe die sous verdik. Ek pak nou alles uit die stoompot uit in die sous in behalwe die aartappels en wortels ... hulle is goed gaar en ek hou dit eenkant in 'n bakkie ... dit sal later teruggaan in die pot in net om op te warm.

Biscuits and Gravy
Tot dusver het ek nog aan niks geproe nie want die kanse is goed dat dit maar goor gaan proe want niks is nog gebalanseer nie. Nou is die tyd vir jou om bietjie meer smaak in die pot te gooi en jy kan enige bottel sousies, stropies en poeiertjies by gooi om jou smaak te pas.

Ek laat die pot op 'n baie lae vlam prut en roer elke 15 minute met die metaallepel. Soos die tyd aanstap begin daai bredie nou houding kry. Na 45 minute is dit tyd om nou die finale afronding van die smake te doen.

Eerste wil ek die suur smaak regkry en gooi a goeie blerts suurlemoensap in die pot ... jy kan asyn ook gebruik. Proe ... as jy die suur goed kan proe is dit Soet se beurt.

Nou die soet kan jy doen met suiker of heuning of konfyt ... sit bietjies vir bietjies by totdat jy net die soet kan begin proe maar die suur moet ook daar wees. Moenie nou sout insit nie, dit gaan jy heel op die einde doen.

Dik beesstert sop
Ek gooi nou gekerfde groenboontjies in die pot en sit ook die wortelstukke in. Laastens sny ek die aartappel in wedges en plaas in die bredie. Roer versigtig want jy wil nie die groentes teveel opbreek nie.

Laat prut nou vir nog 15 minute en dan toets jy vir sout ... kry dit reg en as die sous bietjie dunnerig is kan jy dit nou verdik met met mielieblom, Maizina.

En dit is dit vir die beesstert. Ek maak nie stysel by nie maar dis jou keuse. Ek bedien die bredie in diep borde saam met vars Brood om daai sous op te slurp.

Aartappel Skywe
In my huis het ek en Poppie van die groter stukke geskep Sondag aand en die res is yskas toe.

Maandag aand het ek skons gebak en ons het die oorskiet op die Amerikaanse Biscuits en Gravy manier voorgesit.

Die oorskiet is weer yskas toe, nou was al die groter stukke weg en die bak het slegs lekker sous met beesstert flenters in gehad.

Dinsdagaand het ek aartappel skywe gemaak ... die Amerikaners noem dit Potatoe Planks. In die oond gebak in varkvet, jy kan olie gebruik, totdat dit sulke "oversized crispy chips" was. Ons het dit geëet saam met die laaste sous wat nou maar net 'n dik sop was.

En so trek daai R109.00 se pakkie beessstert ons deur 3 maaltye.

Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.

Donderdag, 08 Februarie 2018

Konfyt - Wildevy geskenk van Bo

As die Here sy hand oopmaak dan moet ons net dankbaar wees en oes. So is dit hier by my gewees ...
Wildevy
Poppie ontdek 'n Wildevy wat vrugte dra en ons altwee skud net ons koppe ... meer as 20 jaar bly ons hier en nie een van ons het ooit die boom opgemerk nie.

Die vrugteboord loop erg deur onder die droogte maar die wildevy het duidelik gekreun onder sy drag ... dit lei ek af van die groot hoeveelhede wat op die grond lê.

So ons gaan haal 'n bak en oes darem so by die 2kg ... dis duidelik laatvye wat ons kry en ek en sy maak 'n nota om die boom volgende seisoen betyds te kom besoek.

Na so bietjie kopkrap het ek besluit dat ek so basterproses gaan volg met die vye en begin deur elkeen mooi af te was en in kwarte te sny.

Die oes
Leesbril op die neus ondersoek ek elkeen want vriende vertel my dat die goed gewoonlik besmet is.
So twee of drie trek reguit kompos toe maar die met miertjies in gaan in die skottel in.

Ek tap die skottel tot oorlopens vol met skoon water en sit my vergieter in die bak se bek in. Nou is die vergieter die hoogste vlak in die bak.

So 30 minute later is die oppervlak vol swemmende miertjies en ek gooi versigtig water by dat die bak oorloop ... met genoegdoening sien ek hoe die mertjies oor die rand verdwyn in die drein af.
Die week het ook bygedra dat die vrugte mooi uitgeplomp het.

Ek dreineer die vrugte en weeg ... 2kg

My standaard konfyt proses dikteer so tussen 70% en 85% suiker.

Ek maak 'n stroop van 1.7kg suiker, 1 koppie water en 'n eetlepel growwe sout.

Natuurlik en organies
Bring dit stadig tot kookpunt en maak seker dat die suiker opgelos is voor dit kook. Was maar die rant van die pot af met skoon water en kwas om die kristalle weg te kry. As jy dit nie doen gaan jy dalk versandsuiker probleme met jou konfyt kry ... of dit waar is weet ek nie maar dis hoe my ouma en my ma my geleer het.

Toets met handoekpapier
Sodra jy die helder borrelende stroop in die pot sien is dit tyd om die vye in te sit. Ek weet van die begin af die gaan 'n baie langer proses wees as my normale konfyt kook want die water in die vrugte moet uitkook. In my normale proses trek die suiker die vog uit terwyl dit oornag in die suiker lê. Ek het teen die manier besluit want ek was bang die "inlê" gaan die vye se tekstuur heeltemal afbreek net 'n papperysel los ... dis wat met gewone vye gebeur.

In met die vye, 1 teelepel gemaalde gemmer en 1/2 teelepel kaneel.

Nou geduld ... ek hou die temperatuur net so oor die 100 grade C ... 'n stadige kook ... onthou die mikpunt is steeds om die water uit die vrugte en stroop uit te kry. Ek roer elke 15 minute vir een uur ... roer maar versigtig sodat jy nie die vye verpleter nie.

Wildevye Konfyt
Na 1 uur gooi ek 'n halwe koppie vars suurlemoensap in. Nou nog kook vir 30 minute en toe begin ek toets. Kyk maar na die foto hierbo hoe ek toets. Die foto is van die mango konfyt maar die prinsiep is dieselfde. Jy kook tot die druppel mooi droog bly vir 10 sekondes.

Net onder twee ure en die konfyt is reg. Tot my verbasing is daar feitlik geen skuin nie weinig van daai digte slym strepe wat gewoonlik op jou kokende konfyt vorm nie. Ek vermoed dit is omdat die vye nie deur al die was en waks prosesse gaan van die gekoopte goed nie ... ek mag egter heeltemal verkeerd wees.

Die vye het kwaai weggekrimp en die uiteinde is 'n skamele 2 en halwe flessies konfyt ... maar dis heerlik en ek sê heimlik DANKIE.


Kook lekker tot ek weer 'n storie skryf.

Hier is my Facebook Bladsy ... Man Kos ... like hom as jy wil.